2025 թ․-ի հոկտեմբերին «Արեգնազան» կրթահամալիրի 7բ դասարանը Հ․ Թումանյանի անվան տիկնիկային թատրոնում կրկին անգամ բեմ բարձրացրեց «Արգոնավորդները» թատերախաղը, որի առաջին տարբերակն անցած տարեշրջանի ավարտին՝ 6-րդ դասարանի ուսումնական տարվա վերջում, արդեն երկու անգամ հանձնել էր հանդիսատեսի դատին։ Դասարանը իր ներկայացումը նաև տարավ Գյումրի և ներկայացրեց այնտեղի հանդիսատեսին։
Ներկայացումը դասարանի փորձն էր՝ բեմում վերակենդանացնելու հին հունական աշխարհի մշակութային տարբեր տարրերը, որպեսզի աշակերտները ձևավորեն հարգանք տվյալ մշակույթի հանդեպ և հնարավորություն ունենան ընկղմվել ժամանակի մշակույթի, տրամադրության ու կենցաղի մեջ, ինչը նրանք ուսումնասիրել էին 6-րդ դասարանի պատմության դասերի ընթացքում։
Թատերախաղի բեմանակացման համար կիրառվել են հունական հեքզոմետր (խոսքի պոետիկ չափ), ծիսական և ժողովրդական պարեր, էվռիթմիական համարներ, հին հունարեն երգ և այլն։ Պիեսն ամբողջությամբ (թե՛ տեքստը, թե՛ տեսարանների լուծումները) նոր է, գրվել և մշակվել է աշակերտների մասնակցությամբ երկու ամիս տևած փորձերի և նախապատրաստական աշխատանքների ընթացքում։
