Արեգնազան կրթահամալիրը Հայաստանի առաջին և միակ վալդորֆյան դպրոցն է, որը 1994 թ.-ից ձգտում է գործնականում իրականացնել իր մանկավարժական իդեալը՝ որպես վալդորֆյան այլընտրանքային ուսուցման մեթոդով ինքնուրույն, ոչ պետական դպրոց։ 1994 թ. Վալդորֆյան մանկավարժությունը ներդրվեց որպես փորձնական դասարան Երևանի հանրակրթական դպրոցներից մեկի կազմում: 2004 թ.-ին փորձաշրջանը հաջողությամբ ավարտվեց, և ՀՀ Կրթության ու գիտության նախարարությունը որոշեց, որ վալդորֆյան մանկավարժության հիմքով դպրոցը պետք է գործի ոչ պետական հատվածում։ Այսպիսով, հիմնադրվեց «Ազատ միջազգային մանկավարժական նախաձեռնություն» ՀԿ-ն, որն էլ հանդիսանում է Արեգնազան կրթահամալիրի 100% բաժնետերը։ 2005 թ.-ի դեկտեմբերի 1-ին, արդեն իսկ գործող վալդորֆյան փորձնական դասարանների հիմքի վրա ձևավորվեց Արեգնազան կրթահամալիրը, իսկ 2007 թ.-ի նոյեմբերի 23-ի ՀՀ Կառավարությանն առընթեր պետական գույքի կառավարման վարչության հետ կնքված պայմանագրի հիման վրա 30 տարի ժամկետով վարձակալության իրավունքով, կրթահամալիրը պետության կողմից ստացավ Սարյան 23 հասցեում գործող դպրոցի մասնաշենքը: 

Նոր կարգավիճակն Արեգնազան կրթահամալիրին ընձեռեց ուսումնառությունը վճարովի հիմունքներով կազմակերպելու հնարավորություն՝ միաժամանակ, սակայն, զրկելով պետական աջակցության բոլոր ծրագրերից: Նոր մարտահրավերները չընկճեցին ուսուցչական ու ադմինիստրատիվ կազմին և ծնողական համայնքին: Նվիրված աշխատակազմի, Արեգնազանի բարեկամների, ծնողական համայնքի և շրջանավարտների ջանքերի և նվիրվածության շնորհիվ տարիների ընթացքում Արեգնազանն իր դռները բացեց ավելի մեծ թվով աշակերտների դիմաց: Արեգնազան կրթահամալիրը իրավազոր մասնավոր ուսումնական հաստատություն է, որն իրականացնում է ուսումնառության ամբողջ ընթացքը՝ առաջինից մինչև տասներկուերորդ դասարան։ Կրթահամալիրի 20 դասարաններում սովորում է շուրջ 650 աշակերտ. Դպրոցում դասավանդում է 60-ից ավելի մանկավարժ: Նաև գործում են երկարօրյայի և արտադասարանային բազմաթիվ խմբակներ: Տարիների ընթացքում Արեգնազանի աշակերտների թիվը բազմապատկվել է: Հավելյալ սենյակներ են վարձակալվել հարակից շենքերից՝ բավարարելու տարածքային սուր պահանջները: Ուսուցչանոցը, ադմինիստրատիվ որոշ սենյակներ նույնպես վերափոխվել են դասասենյակների: 

Ավելի բարենպաստ պայմաններ ստեղծելու և ավելի մեծ թվով աշակերտներ ընդունելու նպատակով մենք Քասախ համայնքում նախաձեռնել ենք դպրոցի նոր՝ ավելի հարմարավետ շենքի կառուցումը, որի մասին ավելին կարող եք կարդալ այստեղ: