Վերջին զանգն Արեգնազանում մի ուրույն տոն է։ 12-րդ դասարանցիներին ճանապարհում, հրաժեշտ է տալիս ամբողջ դպրոցը։ Ավանդույթի համաձայն՝ շրջանավարտներն իրենց ուղեկցող ուսուցիչների հետ միասին Վերջին զանգի օրը շրջում են դպրոցով, այցելում ամեն մի դասարան՝ 1-ից սկսած մինչև վերջին, և այդպիսով մեկ օրվա ընթացքում վերապրում իրենց անցած տարիքային բոլոր փուլերն ու իրենց հրաժեշտը տալիս դպրոցին։ Յուրաքանչյուր դասարան էլ իր փոքրիկ խոսքը, երգը կամ այլ անակնկալն է ընծայում նրանց՝ ճանապարհ դնելով դեպի մեծ աշխարհ։
Իսկ հետո արդեն 12-րդ դասարանն իր շուրջն է հավաքում ծնողներին և ուսուցիչներին՝ հիշելու և պատմելու համատեղ ու առանձին պատմությունները, կիսվելու ապագայի տեսլականներով:
