Բուն Բարեկենդանը տոնվում է Մեծ Պահքին նախորդող առաջին կիրակի օրը՝ գարնանամուտից առաջ: Բարեկենդան բառը ստուգաբանորեն նշանակում է «բարի կենդանություն», այն աղերս է, խնդրանք ու մաղթանք՝ լինելու բարի, առողջ, կենսալից: Այս տոնին հատուկ են ուրախությունն ու զվարճանքը, կյանքի ու բնության նոր սկիզբը միասին և ուրախ դիմավորելը։
Փետրվարի վերջին օրն Արեգնազանում շատ ակտիվ ու դիմակավորված անցավ։ Աշակերտներն ու ուսուցիչները հեքիաթների և այլ պատումների հերոսների կերպարներով «ուրախ դասեր» էին անցկացնում, դասարաններով այցելում ու փոքրիկ երաժշտական ու երգիծական համարներով զվարճացնում միմյանց։
Իսկ ահա մարտի 1-ը մեծ դիմակահանդեսի օրն էր։ Առհասարակ դիմակահանդեսի նպատակը կերպարանափոխվելն ու նոր՝ մինչ այդ անհայտ կերպով կարողանալ լինելն է։ Երբեմն դա հնարավորություն է լինել այնպիսին, ինչպիսին մարդ կուզենար լինել, երբեմն չարը ծաղրելու, արատավոր երևույթները չափազանցված ու ծիծաղելի երևացնելու հնարավորություն է։
Արեգնազանի այս տարվա դիմակահանդեսի թեման «Վայրի արևմուտքն» էր։ Նրան մասնակցում էին 9-րդից 12-րդ դասարանցիները, ինչպես նաև ուսուցիչներ, շրջանավարտներ ու ծնողներ։ Իսկ ահա 8-րդ դասարանցիները կարող էին մասնակցել, եթե այնպես լավ դիմակավորված լինեին, որ նրանց ոչ ոք չճանաչեր։ Օրն անցավ խաղերով, զվարճություններով, անակնկալներով, երկու 9-րդ դասարանցիների պատրաստած բուֆետով ու սրճարանով։
«Ձեզ` Բարեկենդան, մեզ` բարի Զատիկ»
