Սուրբ Ծննդյան միջոցառումը մեր դպրոցի չորս հիմնական տոներից է։ Լույս, ջերմություն և ընծաներ ենք միմյանց բերում ձմեռվա այս ցուրտ, խավար ու երկարող գիշերներում։ Դպրոցի հիմնադրման առաջին տարիներից ի վեր ուսուցիչները, աշակերտներն ու ծնողները միմյանց համար ելույթներ են ունենում՝ տոնական նվագներ ու խաղեր, որոնք յուրահատուկ ու կախարդական նվեր են յուրաքանչյուրի համար։
Դեկտեմբերի 22-ին, չխախտելով բազմամյա ավանդույթը, հրաշալի տոնական համերգով և ներկայացմամբ ճանապարհեցինք հին տարին։ Տարեվերջյան հենց այս միջոցառմամբ էլ ավարտվեց Սուրբ ծննդյան միջոցառումների շարքը։ Սա թերևս արեգնազանցիների կողմից ամենասպասված օրն է, երբ համատեղվում են Արեգնազանի սաների, ուսուցիչների, ծնողների և շրջանավարտների ջանքերը՝ այս անգամ արդեն տոնական բեմում։ Հենց նրանք էլ համ ու հոտ տվեցին Ջոն Թոլքինի <<Դարբինը Մեծ Վութթոնից>> պատմվածքին՝ համանուն յուրահատուկ ներկայացմամբ։
Տոնական տրամադրությունը շարունակվեց առավոտից մինչև ուշ երեկո, իսկ մեր տաղանդաշատ սաներն օրը լցրին իրենց երաժշտական ու պարային համարներով։ Երկմաս միջոցառումն ընդմիջվեց մեր իններորդ դասարանցիների կազմակերպած բուֆետով․ նրանք ջանք ու եռանդ չէին խնայել իրենց ձեռքերով պատրաստելու համեղագույն խորտիկներ ու ըմպելիքներ։
